Azərbaycan Respublikası Prezidentinin işğaldan azad edilmiş ərazilərdə müvafiq xüsusi nümayəndəliklərinin, Azərbaycan Respublikasının Gənclər Fondunun, Azərbaycan Könüllü Təşkilatları İttifaqının dəstəyi və “Böyük Qayıdış” Gənclər Təşkilatının tərəfdaşlığı ilə təşkil olunan "Qayıdış Könüllüləri" proqramının əsas məqsədi işğaldan azad olunmuş rayon və şəhərlərdə könüllülük fəaliyyətinin təşviq edilməsi, əslən işğaldan azad olunmuş ərazilərdən olan gənclərin könüllülük fəalyyətinin stimullaşdırılması, rayonun tarixinin təbliği, könüllülərin yenidənqurma və bərpa işlərində iştirakçılığını təmin etməkdir.
“Qayıdış Könüllüləri” Proqramı çərçivəsində 10 noyabr 2022-ci ildən Azərbaycan Respublikası Prezidentinin Şuşa rayonunda xüsusi nümayəndəliyinin dəstəyilə “Şuşa Könüllüləri” qrupunun formalaşdırılmasına start verilib. Müsahibə, müxtəlif mövzularda baza təlimləndirmə kursunu və imtahan mərhələsini uğurla başa vuran Şuşa könüllüləri aktiv fəaliyyətə başlayıblar. Həmçinin Şuşada uzunmüddətli fəaliyyətə cəlb olunan ilk könüllü qrupu üçün xüsusi olaraq “Şuşa Bələdçilik Məktəbi” və “İçərişəhər” Dövlət Tarix-Memarlıq Qoruğunda “Muzeylərdə ekskursiya işinin təşkili” mövzusunda peşəkar təlimlər keçirilib.
Proqram çərçivəsində ilk könüllü qrup Şuşada yerləşdirilib, şəhər ərazisi ilə və burada fəaliyyət göstərən müvafiq dövlət qurumları ilə tanış edilib. Şuşada fəaliyyətə başlayan könüllülər şəhər ərazisində müxtəlif könüllü fəaliyyətlərinə, yeni açılmış muzeylərdə bələdçilik xidmətinin göstərilməsinə, o cümlədən mütəmadi olaraq Şuşada keçiriləcək tədbirlərin təşkilində iştiraka, buraya səfər edən yerli və xarici qonaqlarla işə, bərpa və yenidənqurma işlərinə, qayıdışa hazırlıq və məskunlaşmaya dəstəyə, Azərbaycan Respublikası Prezidentinin Şuşa rayonunda xüsusi nümayəndəliyində və Şuşa Şəhəri Dövlət Qoruğu İdarəsində müxtəlif fəaliyyət istiqamətləri üzrə könüllü dəstəyin göstərilməsinə cəlb olunurlar.
“Qayıdış Könüllüləri” Proqramı çərçivəsində 7 sentyabr 2022-ci ildən Qarabağ iqtisadi rayonuna daxil olan işğaldan azad olunmuş ərazilərdə (Şuşa rayonu istisna olmaqla) Azərbaycan Respublikasının Prezidentinin xüsusi nümayəndəliyinin dəstəyilə “Ağdam Könüllüləri” qrupunun formalaşdırılmasına start verilib. Müsahibə, müxtəlif mövzularda baza təlimləndirmə kursunu və imtahan mərhələsini uğurla başa vuran Ağdam könüllüləri bu günə qədər bir sıra fəaliyyətlərin birbaşa iştirakçısı və təşkilatçısı olmuşdur. Könüllülər fərdi inkişaf təlimlərində, komanda quruculuğu fəaliyyətlərində, Ağdam rayonunda keçirilən ağacəkmə aksiyalarında, “Milli Şəhərsalma Forumu”nda, Xocalı faciəsinin 31-ci ildönümünə həsr olunmuş “Unudulmayan tarix” adlı anım tədbirində, Ulu Öndər Heydər Əliyevin 100 illik yubileyinə həsr olunmuş yaşıllaşdırma aksiyasında və bu kimi Qarabağ iqtisadi rayonuna daxil olan işğaldan azad edilmiş ərazilərdə keçirilən mötəbər tədbirlərin təşkilində fəal iştirak etmiş, ümumi koordinasiya işlərinə cəlb olunmuşlar.
Ağdam könüllüləri mütəmadi olaraq Ağdam şəhərinə, Qarabağ iqtisadi rayonu ərazisində bərpa olunan ilk kəndə - Tərtər rayonunun Talış kəndinə və böyük turizm potensialı olan Suqovuşan qəsəbəsinə səfərlər etmiş, burada aparılan bərpa-quruculuq işləri və yaradılan şəraitlə tanış olmuşlar. Cari ilin iyun ayından etibarən könüllülərin işitrakı ilə Talış kəndində yaşayan uşaq, yeniyetmə və gənclər üçün müxtəlif məzmunlu, maraqlı tədbirlərin keçirilməsinə başlanılıb.
“Qayıdış Könüllüləri” Proqramı çərçivəsində 5 dekabr 2022-ci ildən Şərqi Zəngəzur iqtisadi rayonuna daxil olan Cəbrayıl, Qubadlı və Zəngilan rayonlarında Azərbaycan Respublikası Prezidentinin xüsusi nümayəndəliyinin dəstəyilə “Zəngilan Könüllüləri” qrupunun formalaşdırılmasına start verilib. Müsahibə, müxtəlif mövzularda baza təlimləndirmə kursunu və imtahan mərhələsini uğurla başa vuran Zəngilan könüllüləri onlar üçün təşkil olunan fəaliyyətlərə və təşkilati işlərə cəlb olunublar.
Könüllülər müvafiq olaraq Zəngilan rayonu ərazisində müxtəlif könüllü fəaliyyətləri göstərəcək, o cümlədən tədbirlərin təşkilində iştirak edəcək, bölgəyə səfər edən yerli və xarici qonaqlarla işləyəcək, bərpa və yenidənqurma işlərinə dəstək verəcək, qayıdışa hazırlıq və məskunlaşmaya könüllü dəstəyinin göstərilməsinə cəlb olunacaqlar.
Cari ildən etibarən könüllülərin işitrakı ilə Zəngilan rayonunun Ağalı kəndində yaşayan uşaq, yeniyetmə və gənclər üçün mütəmadi olaraq müxtəlif məzmunlu, maraqlı tədbirlərin keçirilməsi planlaşdırılır.